Svigerfar som snart er nitti år, blei interessert då han høyrde at eg toppa stortingslista. Du Alf, sa han. Det er ein ting du må gjere dersom du kjem på Stortinget. Du må arbeide for at det blir fleire plasser for oss som ikkje lenger kan bu heime, men som ikkje treng sjukeheim. Vi treng butilbod og institusjonar som gir tryggleik og sosial kontakt utan at vi må legge oss inn på sjukeheim.
Det slo meg at dette er noko samhandlingsreforma kan bidra med: Rett behandling – på rett stad – til rett tid. Kommunale tilbod som kan bidra til mindre press på sjukeheimar og sjukehus, er ikkje berre god ressursdisponering. Det er også livskvalitet for brukaren.
Etter ferien har eg avtalt å arbeide ein dag ved ein sjukeheim i Kristiansand for å få eit lite glimt av kvardagslivet i omsorgssektoren. Eg har variert yrkeserfaring, men ikkje frå denne sektoren. Derfor kan det vere nyttig å høyre litt om korleis omsorgsarbeidarane ser på utfordringane i sektoren og på den jobben vi politikarar gjer. Kjem eg på Stortinget, har eg lova at eg skal bruke tid på å besøkje arbeidsplassar og organisasjonar som ønskjer det.
Alf Holmelid 