I valkampen snakka Gitmark i all hovudsak om firefelts veg og politi. Ein rask sjekk av NRK sin veljargaranti og andre oppslag på Internett viser at han også var innom skole og færre restriksjonar for hyttebygging i strandsona. Men miljø og klima var ikkje i fokus så langt eg kan sjå, med unntak av eit angrep på mine forslag om å satse på miljøteknologi.
Derfor er det svært gledeleg at Gitmark i ein kronikk i Fædrelandsvennen no etter valet tar til orde for å ta klimautfordringane på alvor og satse på ein meir offensiv klimapolitikk. Det viktigaste forslaget hans i denne kronikken er ei kraftig satsing på miljøteknologi. Det er ei sak som eg kjempa for i heile valkampen. Derfor er et er svært gledeleg at Gitmark no går ut med klar støtte til ei slik satsing, og eg ser fram til eit konstruktivt samarbeid på dette området.
I samsvar med programerklæringa til dei borgarlege på Agderbenken om å terge SV, kjem Gitmark samtidig med nokre spark til SV sin klimapolitikk. Den kan absolutt bli betre. Men det er verdt å merke seg at den kjente BI-professoren Jørgen Randers konkluderte med at dei som meiner klima er viktig, bør støtte SV. Det same har fleire miljøorganisasjonar gjort.
Alf
Alf Holmelid 