Støre har starta den lange valkampen og gjentar stadig at han vil vinne valet. Men kva legg han i det? Eg går ut i frå at det inneber å hindre at høgresida overtar regjeringsmakta. Men fører han ein politikk som gjer det tydeleg kva som er hans alternativ til ei Solberg-regjering?
Det siste valet gav den breie venstresida frå SP og utover til venstre eit klart fleirtal på Stortinget. Det blei ikkje ei fleirtalsregjering, men samarbeidet med SV har redda budsjetta. Dei endringane som har komme inn i budsjettet etter forhandlingane med SV, har stort sett fått positiv omtale og blir ofte trekt fram av AP-folk når dei skal skryte av budsjettet.
Men i det siste har det skjedd ei dramatisk endring. I store strukturelle spørsmål som har omfattande konsekvensar i mange tiår framover, så har AP valt å alliere seg med partia på høgresida inklusive FrP. I landbrukspolitikken skapte det eit kaos som førte til at det viktige spørsmålet om opptrapping av inntektene til bøndene ikkje blei vedtatt. I saka om fordeling av fiskerikvotar førte det til at vi ikkje fekk stoppa sentraliseringa og konsentrasjonen av ressursar på få hender.
Då reiser det seg eit spørsmål. Kva er det Støre lovar veljarane sine dersom den breie venstresida får fleirtal også ved neste val. Er det som sist å ta ansvar for at det blir ei regjering som baserer sin politikk på det breie venstre. Eller er det ei regjering som søkjer samarbeid med høgresida i store saker som ressursfordeling og inntekt?
Dersom Støre ønskjer å halde fram med å leie ei regjering med støtte frå venstresida, så bør han seie og vise det. Dei siste vekene har han ført ein politikk som reiser spørsmål om det er det han vil. Det kan synast som om han trivs best som leiar av ei sentrumsregjering som kan samarbeide til høgre når krava om fordeling og solidaritet frå venstresida blir for sterke.
Eg er slett ikkje sikker på at dette er ei vinnaroppskrift@. AP kan kanskje få nokre veljarar frå sentrum-høgre, men eg trur dei vil tape fleire til sofaen.
Alf
Alf Holmelid 